മസ്‌കറ്റ്: കൊവിഡ്-19 നിയന്ത്രണങ്ങളിൽ ഇളവുകൾ നൽകുകയാണ് രാജ്യങ്ങൾ. സാമ്പത്തിക പ്രസിന്ധി മറികടക്കാൻ ജനജീവിതം സാധാരണ നിലയിലേക്ക് എത്തിക്കുകയാണ് ലക്ഷ്യം. കൊവിഡ് മാർഗനിർദേശങ്ങളം മാനദണ്ഡങ്ങളും പാലിച്ചാണ് ഇളവുകൾ നൽകുന്നത്. പ്രതിസന്ധി മറികടക്കാൻ പ്രവാസികൾക്കായി കൂടുതൽ ഇളവുകൾ നൽകുകയാണ് ഗൾഫ് രാജ്യങ്ങൾ. വിസ ചട്ടങ്ങളിലടക്കമാണ് ഇളവുകൾ. മടങ്ങിപ്പോയ പ്രവാസികളെ തിരിച്ചെത്തിക്കുകയാണ് ഇളവുകൾ നൽകുന്നതിലൂടെ അറബ് രാജ്യങ്ങൾ ലക്ഷ്യംവെക്കുന്നത്. ഇതിനിടെ കൊവിഡ് സാഹചര്യത്തിൽ ഒമാനിലെ വിമാനത്താവളങ്ങൾ പുതിയ നിർദേശങ്ങൾ പ്രഖ്യാപിച്ചു.

രാജ്യത്ത് കൊവിഡ് കേസുകൾ തുടരുന്ന സാഹചര്യത്തിൽ സ്വദേശികളെയും വിദേശികളെയും ഉൾപ്പെടുത്തി ദേശീയ സെറോളജിക്കൽ സർവേയുടെ നാലാം ഘട്ടം ഒമാൻ ഭരണകൂടം ആരംഭിച്ചു. രാജ്യത്തെ കൊവിഡ് വ്യാപനത്തിൻ്റെ തോത് തിരിച്ചറിഞ്ഞ് തുടർ പ്രവർത്തനങ്ങൾ നടത്തുകയെന്ന ലക്ഷ്യത്തോടെയാണ് സർവേകൾ നടത്തുന്നത്. എല്ലാ പ്രായത്തിലുമുള്ളവരെ ഉൾപ്പെടുത്തിയാണ് സർവേ നടത്തുന്നത്. രാജ്യത്തെ പ്രവാസികളിലാണ് കൊവിഡ് കേസുകൾ കൂടുതലെന്ന റിപ്പോർട്ടാണ് ആദ്യഘട്ട സർവേ റിപ്പോർട്ടിൽ നിന്ന് വ്യക്തമായത്.

കൊവിഡ് നിയന്ത്രണങ്ങൾ മൂലം യാത്ര ചെയ്യുന്നതിൽ ബുദ്ധിമുട്ട് തുടരുന്നതിനിടെ ഇൻഡിഗോ, ഗോ എയർ, സ്‌പൈസ് ജറ്റ് എന്നീ വിമാന കമ്പനികൾ ഇന്ത്യയിൽ നിന്ന് ഒമാനിലേക്ക് തിരിച്ചും സർവീസുകൾ നിർത്തലാക്കിയതോടെ മലയാളികൾ അടക്കമുള്ള പ്രവാസികൾ ആശങ്കയിലായി. നവംബർ 30 വരെയുള്ള എയർ ബബ്ൾ കരാർ പ്രകാരമുള്ള പ്രതിവാര സീറ്റുകളുടെ എണ്ണം പുനർനിർണയിച്ചതോടെയാണ് ഈ സാഹചര്യം ഉണ്ടായത്. ഇതോടെയാണ് സ്വകാര്യ വിമാനക്കമ്പനികളോട് സർവീസുകൾ അവസാനിപ്പിക്കാൻ അധികൃതർ ആവശ്യപ്പെട്ടത്. കൊവിഡ് മാനദണ്ഡങ്ങളും മാർഗനിർദേശങ്ങളും നിലനിൽക്കെ സർവീസുകൾ നിർത്തലാക്കിയത് പ്രവാസികളെ ആശങ്കപ്പെടുത്തുന്നുണ്ട്.

15 വയസും അതിൽ താഴെയുള്ള കുട്ടികൾ പി സി ആർ പരിശോധന നടത്തേണ്ടതില്ല. രാജ്യത്തെ വിദേശ എംബസികളിൽ ജോലി ചെയുന്ന നയതന്ത്ര ഉദ്യോഗസ്ഥർ കൊവിഡ് പരിശോധനയ്‌ക്ക് വിധേയമാകേണ്ട. 38 ഡിഗ്രി സെൽഷ്യസിനോ അതിൽ കൂടുതലോ താപനിലയുള്ള ഏതെങ്കിലും യാത്രക്കാരനെ വിമാനത്താവളത്തിലെ തെർമൽ സ്ക്രീനിംഗ് തിരിച്ചറിയുന്നുവെങ്കിൽ അവർ കൊവിഡ് പിസിആർ പരിശോധന നിർബന്ധമായും നടത്തണം.

കൊവിഡ് ഭീഷണി തുടരുന്ന സാഹചര്യത്തിലാണ് യാത്രക്കാർക്ക് കർശന നിർദേശങ്ങൾ നൽകിയിരിക്കുന്നത്. രാജ്യത്തെക്ക് പുറപ്പെടുന്നവർ 96 മണിക്കൂർ മുൻപ് കൊവിഡ് പിസിആർ പരിശോധന നിർബന്ധമായും നടത്തണം. ഏതെങ്കിലും അംഗീകൃത ലാബുകളിൽ നടത്തിയ പരിശോധനയുടെ ഫലം യാത്രക്കാർ കൈവശമുണ്ടായിരിക്കണം. രാജ്യത്ത് എത്തുന്ന യാത്രക്കാർ പി സി ആർ ടെസ്‌റ്റിന് വിധേയമാകുകയും കൊവിഡ് സ്ഥിരീകരിച്ചാൽ ഏഴ് ദിവസം ക്വാറൻ്റൈനിൽ കഴിയുകയും വേണം. നെഗറ്റീവ് ഫലമാണെങ്കില്‍ ക്വാറന്റീന്‍ അവസാനിപ്പിക്കാം. മൂന്നാമത് ഒരു പരിശോധന കൂടി നടത്താന്‍ താല്‍പ്പര്യമില്ലാത്തവര്‍ 14 ദിവസം ക്വാറൻ്റൈനിൽ കഴിയണം.

കൊവിഡ് നിയന്ത്രണങ്ങൾ തുടരുന്ന സാഹചര്യത്തിൽ പുറപ്പെടുവിച്ച നിർദേശങ്ങൾ നവംബർ 11 മുതൽ പ്രാബല്യത്തിൽ വരുമെന്ന് ഒമാൻ വ്യക്തമാക്കി. കൊവിഡ് പരിശോധനാഫലവുമായി ബന്ധപ്പെട്ട വിവരങ്ങളും ക്വാറൻ്റൈൻ കാലാവധിയിൽ കഴിയേണ്ട ദിവസങ്ങളും സംബന്ധിച്ച നിർദേശങ്ങളാണ് ഒമാൻ ഭരണകൂടം നൽകിയിരിക്കുന്നത്. വിമാന കമ്പനികള്‍ക്ക് ഒമാന്‍ സിവില്‍ ഏവിയേഷന്‍ അതോറിറ്റി അയച്ച സർക്കുലറിലാണ് ഇക്കാര്യങ്ങൾ വിശദീകരിച്ചിരുന്നത്.